Co lema “Museos nun mundo cambiante. Novos retos, novas inspiracións” o Museo Arqueolóxico Provincial de Ourense propón a seguinte programación:

· CHARLA DIDÁCTICA sobre TRES PERSPECTIVAS DA COMUNICACIÓN NO PASADO

Mércores día 16 ás 12,30 h. Sala de exposicións de San Francisco

No contexto actual, onde as novas tecnoloxías e o modo de comunicarse mudan constantemente, os museos procuran facerse escoitar. Con esta actividade queremos amosar tres xeitos de comunicación doutros momentos históricos que contrastan co contexto do século XXI, pero que tamén explican e aportan unha orixe á nosa forma de relacionarnos. Falarase do comercio no Mundo antigo, a forma da imaxe na escultura románica e a comunicación escrita a través de selos e documentos.

A charla irá complementada con diversas pezas dos fondos do Museo que reflictan as épocas e temáticas expostas anteriormente, así como fotografías e mapas que axuden a introducirse no contexto xeográfico e cultural.

· PRESENTACIÓN DA “PEZA DO MES”: CAMAFEO DAS BURGAS, coa utilización de novas tecnoloxías aplicadas á investigación e á presentación.

Venres día 18 ás 20 h. Sala de exposicións de San Francisco

A utilización do microscopio binocular e da luz de fibra óptica coa combinación do emprego da informática permitiron o recoñecemento de determinados procesos de fabricación, de gran importancia, desta interesante peza, que doutro xeito sería imposible de descubrir.

Por outra banda utilizase como apoio para a presentación unha reconstrucción virtual deste Camafeo das Burgas, empregando técnicas de animación e modelado 3D para recrear mediante combinación de imaxe de síntese e material fotográfico o proceso de fabricación da peza e explicar a súas peculiaridades. A aplicación desta tecnoloxía ao eido da arqueoloxía permite xerar material que pode ser empregado, tanto a nivel técnico e de investigación, como didáctico con fins divulgativos.

· VISITA GUIADA AO EDIFICIO E ÁS ESCAVACIÓNS DA PRAZA MAIOR.

O venres día 18 ás 12 h.

Co motivo deste día o Museo edita un marcapáxinas coa imaxe da Peza do mes e un lapiseiro como agasallo aos visitantes.

musarqourense en Facebook

Presentación da “Peza do mes” coa utilización de novas tecnoloxías aplicadas á investigación e á presentación o venres día 18 ás 20 h. na Sala de exposicións de San Francisco no marco do Día Internacional dos Museos. Entrada libre.

(more…)

O mércores, 11 de abril, ás 20:00 h. terá lugar a presentación da Peza do mes: “Escaparate coas imaxes de San Xoaquín e Santa Ana“, na sala da exposición “Escolma de Escultura” en San Francisco (Ourense). A explicación correrá a cargo de Ana Mª Veiga Romero.

Entrada libre.

A Consellería de Cultura, Educación e Ordenación Universitaria, a través do Museo Arqueolóxico Provincial de Ourense e do Museo Etnolóxico de Ribadavia, participa nunha iniciativa promovida pola Rede Dixital de Museos de España, a exposición en liña Ausencias e silencios

Con motivo do Día Internacional da Muller, a Rede Dixital de Coleccións de Museos de España, Cer.es, presenta o catálogo temático Ausencias e Silencios. O novo catálogo forma parte de Patrimonio en Feminino, unha iniciativa coordinada polo Ministerio de Educación, Cultura e Deporte que foi creada no ano 2011 co obxectivo de darlle visibilidade ao papel das mulleres en diferentes culturas, civilizacións e períodos históricos.

A través desta mostra virtual destácanse aqueles ámbitos nos que a actividade feminina estivo ausente ou ben, si a houbo, foi silenciada. A exposición articúlase arredor de cinco grandes áreas temáticas: autoridade e poder, educación e ciencia, creación e espectáculo, traballo e labor, e dereitos e igualdade. O Museo Arqueolóxico Provincial de Ourense participa na exposición no apartado de dereito e igualdade, coa Tábula de Castromao, unha peza epigráfica de bronce que constitúe un claro exemplo da ausencia da muller no mundo do dereito público e político no imperio romano.

(more…)